سفة حبة بيضاء وحبة محمرة ساهلة وسريعة

اليكن اليوم طبق جديد ديال السفة
بطريقة جديدة وسريعة في مدة ربع ساعة السفة واجدة والحمد لله هدا من ابتكاري في مطبخي المتواضع


المقادير :

ملعقة ديال الزبدة
جوج معالق كبار زيت المائدة
زبيب
شعرية ديال السفة
ملح
شوية كنور


الطريقة :








في طنجرة نحطو الزبدة والزيت وفوق البوطة على عين صغيرة وعلى نار متوسطة نخليوهم يدوبو مع بعض

من بعد نضيفو لهم الشعرية

نقلبو مزيان ونصبرو عليها واحد 3 دقايق وحنا كنقلبوها( الى بغيتوها حبة محمرة وحبة بيضة نخليو الي في القاع تتحمر شوية ومن بعد نقلبو الى بغيتوها كلها لون واحد ابيض ما نخليوهاش حتى تتحمر )

بحال هاكدا انا بغيتها حبة محمرة وحبة بيضة وهدا هو الجديد في هاد السفة

نضيفو عليها الماء الي يتقاد معاها ماشي يغرقها باش ما تتعجنش الماء يكون في مستوى الشعرية

نخليوها حتى تتشرب الماء دائما على نار متوسطة

من بعد نضيفو الزبيب الي غسلناه فقط وشوية ديال الملح وشوية ديال كنور

نحركوهم باش يتخلطو مع بعض

نغطيوها مزيان ونقصو عليها البوطة للاخر



كل خمس دقائق نحلو عليها ونقلبوها باش ما تلصقشحتى نكملو ربع ساعة بمعنى غادي تحلي عليها وتقلبيها بالمعلقة تلات مرات وملي تدوقيها وتلقايها طابت طفي عليها

من بعد ها السفة واجدة انا قدمتها باللوز مفزك ومفسوخ من غير ما نقليه وايضا المشماش معسل
وانتي لك الاختيار
الصراحة مداقها رائع غير هي البوحدها من غير دجاج ولا لحم
المهم انا وريتك الطريقة وانتي كملي حسب الرغبة ديالك
الى بردات لك وبغيتي تسخنيها عند التقديم ديريها في الكسكاس تسخن وقدميها

شكرا لكي أختي

إن شاء الله نجربها

باينة بنينة سفة مولات لي ميش

هههههههه ضحكتيني أختي أم الأميرات و الله إلا لقيتي السمية المناسبة.السفة بلي ميش ههههههه.

تبارك الله عليك أختي أم عبد الرحمـــن
حادكة ما عندي ما نقول.الله يعطيك الصحة و يبارك ليك في صحيحتك و يرزقك من حيث لا تحتسبين.

تبارك الله عليك زوينة هاد الطريقة وساهلة و سريعة خصوصا ان اولادي كيبغيوها بزاف بهاد الطريقة نولي دغيا نوجدها