موضوع: بلاطو حلويات باللوز من مطبخي المتواضع (صورة) الثلاثاء مايو 17, 2011 12:37 pm
أخواتي و حبيباتي في الله
هذه مجموعة من الحلويات باللوز كنت حضرتها لواحد المناسبة
الحلوة الأولى : كعب غزال على شكل عوينة
هاد الحلوة خديت الشكل ديالها من ضيفة شميشة و شهيوات بلادي في مدينة آسفي.اللي شافت الحلقة غادي تعرف الطريقة.
المقادير:
العجينة: 250غ الطحين الحلوة ملعقة كبيرة الزبدة لينة ملعقة كبيرة السكر كلاصي ماء الزهر للعجين
نغربل الطحين في قصعة و نضيفه ليه شوية الملح و الزبدة و السكر.نعجن بالماء الزهر.العجينة لازم تكون قابطة فراسها و ما تكونش مرخوفة باش نتحكموا فيها مزيان.ندلكوها مزيان و نكوروها و نخليها شوية بين ما وجدت العقدة
عقدة اللوز: نصف كيلو لوز مصلوق و مقشر و مطحون مع رابعة سنيدة. شوية الماء الزهر المسكة الحرة ملعقة كبيرة الزبدة لينة
نعمل العقدة على شكل أصابع رقاق.
نطلق العجينة بالمدلك و من بعد بآلة السباكيتي رقيقة بحال ديال كعب غزال.نحط الصبيعات ديال العقدة و نغطيهم بالعجين.نقطع بالجرارة و نضغط عليه باش نعطيه شكل الكعب لكن بدون ما نكمل .نقلبها باش يكون الجهة المشنفة اللي قطعناها بالجرارة الفوق.و عاد نكمل تشكيل الكعب.نجمع الرؤوس بزوج و نشكلها بحال العين.نحط في الوسط لوزة بقشرتها.و نزوق الجناب بالمنقاش.
ملي تطيب نصب شوية ديال النباج على اللوزة باش تعطيها لمعان.
الحلوة التانية: حلوة الطاسات
و هاذ الحلوة عملت بها ثلاتة ديال الشكيلات .واحدة زينتها باللوز افيلي و زوج بوريقات من العجينة باللون الأحمر و الأخضر.
المقادير:
العجينة: نصف كيلو الطحين الحلوة نصف رابعة الزبدة مدوبة ملعقة كبيرة السكر كلاصي الماء+ماء الزهر
الحشوة: نصف كيلو لوز مصلوق مقشر و مطحون نصف كيلو سنيدة قشرة حامضة 3 حتى 4 بيضات على حسب واش كبار و لا صغار راس الملعقة صغيرة الخميرة الحلوة
الطريقة:
نغربل الطحين و نضيف ليه شوية الملح و السكر كلاصي و الزبدة .نخلط حتى يترمل.نعجن بالماء و الماء الزهر .ندلكها مزيان و نكورها و نخليها ترتاح.
نخلط اللوز و السكر و البيض و قشرة الحامض و الخميرة في اناء و نخليه جانبا.
نطلق العجين و نرققه مزيان.نلبس بيه الطاسات اللي نكون من قبل دهنتهم بالزبدة و نرشهم بشوية الدقيق.
ملي نكمل كل الطاسات اللي عندي.نصب في كل واحدة ملعقة صغيرة من حشوة اللوز.نزين البعض باللوز افيلي أو بالعقيق الملون. و الجزء التاني نطلق العجينة رقيقة و ناخد طابع صغير على شكل ورقة الوردة .نغطس الطابع في الملون أحمر أو أخضر و نقطع بيه العجين.ناخد 4 الوريقات و نحطهم فوق الطاسة اللي عمرناها بالحشوة ,على شكل وريدة و نغرس الوسط لوزة بقشرتها. و ملي نخرجهم من الفرن ندهنهم بالنباج.
الحلوة الثالتة: الملوزة باللون الوردي
المقادير:
500غ لوز مصلوق و مطحون مع رابعة سنيدة 1 كيس فاني قشرة حامضة ملون أحمر البيض عينك ميزانك (2 أصفر+ 1 أبيض) ملعقة كبيرة زبدة ملعقة كبيرة نشا أو أكثر
نخلط كل المقادير .لازم اللون يكون وردي ما نكثرش اللون بزاف.نكورها كويرات صغار لأنها كنتفخ شوية في الفران. نمرمد الكويرات في سنيدة و نزينها بالمعلقة الصغيرة من الجناب كيف باين في الصورة. نحطها على اللاطة و نضغط في الوسط باش نعمل حفرة صغيرة. ملي نخرجها من الفرن نكون وجدت علبة نستلي و طيبتها في الكوكوط باش نحصل على كراميل. نعمر الوسط ديال كل حلوة بكراميل نستلي و نزينها بنصف حب ملوك حمراء معسلة.
500 غ بودرة اللوز 250 غ السكر كلاصي 4 معالق كبار العسل 2 أو 3 بيضات ملعقة كبيرة قهوة سريعة الذوبان مع شوية الماء ملعقة كبيرة الزبدة
للتزيين بياض البيض اللوز افيلي مهرس شوية 100 غ شكلاط أسود 2 معالق كبار القشدة الطرية ملعقة صغيرة القهوة
نخلط اللوز مع السكر و باقي المقادير.نحربلهم على شكل عصيات و ندهن بالبياض البيض.نمرمد العصيات في اللوز افيلي و نخليهم في الفريكو 6 الساعات على الأقل.من الأحسن نخليهم يباتو حتى الغد. نقطعهم على شكل دوائر و نثقب كل دائرة من الوسط.ملي نخرجهم من الفرن.نحضر لا كاناش بالشكلاط.
في كاصرونة على نار هادئة نصب القشدة الطرية تدوب مع القهوة.و نضيف الشكلاط الأسود و نخليه يدوب.
ناخد الكاناش و نزين الثقوب اللي درنا في الحلوة بيها.
الحلوة الخامسة: غريبة ببودرة اللوز
المقادير:
250 غ الزبدة لينة 2 بيضات كاس الزيت 100 سكر كلاصي 125 غ بودرة اللوز قطرات من روح اللوز 2 خمارات الحلوة الدقيق حسب الخليط
للتزيين أبيض البيض و اللوز افيلي
نخلط الزبدة مع السكر و نطربهم مزيان حتى تولي بحال الكريمة .نضيف الزيت و البيض و نخلط و نضيف اللوز و الروح اللوز و الدقيق مع الخميرة. نعمل من العجين كويرات و ندوزهم في بياض البيض و اللوز افيلي . نحطهم متباعدين فوق لاطة مغطية بالورق السولفيريزي.
موضوع: رد: بلاطو حلويات باللوز من مطبخي المتواضع (صورة) الأربعاء مايو 18, 2011 4:09 pm
أم الاميرات كتب:
إن شاء الله نجرب minhom chi haja
راه عيد ميلاد ساره سمانا جاية و باقة تالفة
كل عام و بنتنا الحبيبة سارة بكل خير و الله يكبرها على طاعة الله و رسوله و تفرحي بيها و بأختها و تشوفيهم كيف تتمناي. نتمنى تلقاي من بين وصفات المنتدى اللي يعجبك و يكون صالح باش تفرحي بنياتك.ربي لا يحيرك أختي و ييسر ليك أمورك. و إلا محتاجة أي مساعدة أو عندك أي استفسار أنا موجودة .ربي ليك عوين الحبيبة.
موضوع: بلاطو حلويات باللوز من مطبخي المتواضع (صورة) 
