السلام عليكم ورحمة الله وبركاته
غنحاول نقدم ماعندي من معلومات حسب تجربتي الخاصة وتجربة اقرب صديقة ليا
بالنسبة للاوراق غير شهادة الكفاءة لي خصها المصادقة من وزارة الخارجية
شهادة الكفاءة وشهادة العزوبة او الطلاق مع شهادة الميلاد مع السجل العدلي لي كيجيب الراجل من بلاد اقامته خصهم ترجمة بالعربية وخص يكون مترجم محلف ومعترف به لدى محاكم المغرب يعني ترجمة الانترنت كيف قالت شي اخت منفعاش يعني دفعي الفلوس
منين تجمعي اوراقك واوراق ديال الراجل غيبقى يخصك شهادة الاقامة بالنسبة لخطيب في المغرب كيفاش غتصوبها لو ساهلة اابوك ولا خوك يكتبها عند كاتب عمومي بان داك الراجل على ضمانته وتجليزها في المقاطعة وغتكتب طلب لقاضي بادن بالزواج المختلط عند كاتب عمومي وتمضي فيه انت والراجل
شهادة طبية عادية من عند اي طبيب ب 50 درهم
دبا جمعتي كلشي نوضي بكري وسيري انتي والراجل للمحكمة الاسرة دخلي عند القاضي غتقولي لو زواج مختلط غيبقى يطلب ليك الاوراق وحدة وحدة الا شي ورقة ناقصة غيطرد عليك تمشي تجيبها مكاينش الله يسامح والا كلشي مزيان غيبقى يسولككم والراجل كتر غيسولو على الدين على الطلاق شنو كيخدم شحال فالدخل يعني كيتحقق من الاوراق لي قدامو من بعد كيعيط لكاتبة وكتاخدك معاها اولا كتطلب منك داك الدوسي كلو ديري ليه 4 ديال فوطوكوبي وكل نسخة في ملف والاصلي في ملف لونه مغاير
الا كاتبة بنت ناس دغيا كتسجل كلشي وكتاخد منك نسخة من الملف وكتعطيك ورقة باش تمشي لكوميسارية
منين تاخدي الورقة من الكاتبة خصك تمشي لاقرب صيدلية ديري شهادة عدم الحمل تاخدها معك مع نسخة من الملف ومع الورقة ديال الكاتبة وتمشي عند البوليس عند البوليس نفس شيء اسئلة انتي وياه ومن الاحسن يكون شي حد كتعرفيه ولا دي باك معك لانهم كيخسرو الهضرة وبيني ليهم انك مخيفاش منهم البوليس اولاد الحرام وانتي وزهرك فين طحتي
غيقول ليك واحد الاسبوع ورجعي رغبيهم راهم يقدو المسائل في نهارها
غيعطيوك ظرف مسدود متحليهش خصك تعطيه للكاتبة وسمحوا ليا راه حتى الكاتبة غتعطيك ظرف مسدود ماشي ورقة
غترجعي لكاتبةوهي تاني تصفطك للقاضي القاضي غيطلع على داك شي لكتبات الكاتبة ديالو وغيعطيك ادن الزواج وغياخد منك نسخة من الملف
نسخة لي بقات ليك غتضيفي ليها ادن القاضي وتعطيها لعدول باش يعقدو ليك وحتى العدول منين كيسمعو زواج مختلط غيطلبو ليك 850 درهم ولكن رغبيه يطلعو ليك العقد بسرعة والف مبروك عليك
هادشي حسب تجربتي وتجربة صاحبتي من شهر 7 و9 عام 2009 وبمدينة الراشيدية معطينا حتى ريال رشوة وكلشي طلع في 3 ايام