تبث من طرف راضية بقضاء الله و قدره
اخواتي العزيزات حبيت نقدم ليكم وصفة ساهلة و لذيذة غنحتاجو
قطع دجاج حسب الرغبة الى كانو ركب يكون افضل _ قزبر و معدنوس _ ملعقة كبيرة موطارد _ شوية السمن _ 4 فصوص ثوم _ ملح _ ابزار _ سكينجبير _ كامون _ خرقوم _ملعقة كبيرة زيت _ للقلي غنحتاجو 2 بيضات _ دقيق ابيض _ شابلور
كنخلطو المقادير الاولى جيدا ونحاولو نخليوها مدة 2 سوايع او اكثر باش تنسم مزيان
بعد ما كيترقد الدجاج كنوضعوه فكوكوط مع نصف كاس ماء و نسدو عليه ونشعلو عليه عافية مهيلة حتى يطيب و ينشف كتبقى غير الدغميرة و نخليوه حتى يبرد وناخدو قطع الدجاج و البيض و االدقيق و الشابلور
ناخدو الدجاج ونوضعوه فالدقيق ثم فالبيض واخيرا فالشابلور
ملي نكملو القطع كلها نديرو الزيت يسخن ثم نقليوهم و نوضعوهم على ورق منشف باش ياخد فائض الزيت
فالتقديم رافقتو مع الصلصة الي بقات من الدجاج و مع الروز وبالصحة و الراحة
ولا تنسونا من صالح دعائكم
موضوع: دجاج مقلي بالشابلور 
