موضوع: حليوة باللوز للمناسبات رائعة منظر و مداق (صورة) السبت مايو 14, 2011 8:58 pm
أختي الحبيبة
هادي حلوة ساهلة و كتجي زوينة في المنظر و المداق.ممكن تحضريها في المناسبات أو تبرعي بيها على راسك و عائلتك.
الصورة كانت عندي قديمة و كنت كننتظر حتى نحضرها مرة تانية باش نصور المراحل كلها ديال التحضير,لكن مازال ما كتاب و قلت نحطها و اللي عندها شي سؤال ما تتردد راني دائما رهن الاشارة للإجابة على أي استفسار.
المقادير:
1 كيلو لوز مقشر و مطحون مع 500غ سكر سنيدة الماء الزهر شوية المسكة الحرة قشرة برتقالة محكوكة 2 أصفر البيض 2 معالق كبار الزبدة لينة قبيصة الملح 150غ الفواكه معسلة حمراء و خضراء مقطعة 50غ قشرة البرتقال معسلة و مقطعة
للتزيين: 500غ لوز مقشر و محمر و مهرمش
الطريقة :
نطحن اللوز مع السكر حتى نحصل على العقدة بحال ديال كعب غزال.نخلط معاه كل العناصر اللي دكرت.نخلي العقدة تشرب ليلة كاملة في الثلاجة.
نعمل منها حرابل رقاق ندوزهم في اللوز المحمر و المهرمش.نحطهم في بلاطو مغطي بالبلاستيك الغدائي .و ندخلهم للكونجلاتور حتى يقصاحو .نخرجهوم و نقطعهم لقطع متساوية و بشكل مائل.
نحطهم في لاطة مغطية بالسولفيريزي و ندخلهم لفرن ساخن لمدة 10 دقائق على الأكثر باش ما تقصاح. ملي نخرج الحلوى من الفرن ندهنها بالعسل أو الناباج و نديرها في الكويغطات ديال الحلوة.
و بالصحة و الراحة نتمنى تعجبكم و تجربوها اللهم أدمها نعمة و بارك لنا فيها و احفظها من الزوال
باقة ورد لكل من ستشرفني بزيارة موضوعي أحبكن في الله
موضوع: رد: حليوة باللوز للمناسبات رائعة منظر و مداق (صورة) الثلاثاء مايو 17, 2011 9:24 pm
أم عبد الرحمن كتب:
واش ممكن نستغنى على قشر البرتقال معسل؟ جازاك الله كل خير
و أنت من أهل الجزاء أختي. نعم ممكن الاستغناء على قشرة البرتقال المعسلة و يكفي قشرة البرتقال المحكوكة تنسم الحلوى أو ممكن تنسميها بحسب رغبتك.و ممكن تعوضي قشرة البرتقال المعسلة بالزبيب أو المشماش يابس مقطع.يعني حسب رغبتك و ذوقك.
موضوع: حليوة باللوز للمناسبات رائعة منظر و مداق (صورة) 
