موضوع: بلاطو حلويات صابلي من مطبخي المتواضع (صورة) الثلاثاء مايو 17, 2011 12:49 pm
السلام عليكم و رحمة الله و بركاته هذا بلاطو من حلويات الصابلي و إن شاء الله نحط كل شكل بالمراحل المصورة
حلوة الوردة
المقادير
نصف كيلو الزبدة لينة رابعة سنيدة 4 بيضات نصف رابعة الكوك 2 خميرة الحلوة الدقيق حسب الخليط بودرة الشكلاط العقيق الفضي للتزيين
الطريقة
نخدم الزبدة مع سنيدة مزيان حتى تولي بحال الكريمة.نضيف البيض بوحدة بوحدة و انا كنخلط.و نزيد الكوك و الخميرة و قبصة الملح و الدقيق حتى تجمع العجينة.نخليها مرخوفة .ناخد جزء من العجينة و نضيف عليه الشكلاط بودرة .
ندير العجينة في الآلة ديال الحلوة .ما عرفتش اسمها.لكن هي آلة كتخرج الحلوة باشكال مختلفة.نختار شكل وردة. ملي نكمل ,ناخد العجينة اللي ضفنا ليها الشكلاط و نديرها في الجيب الحلواني و يكون البوق صغير و نزوق بيها الوردات . نحط من الفوق العقيق الفضي و ندخلها للفرن.
غريبة البهلة
المقادير
كيلو الدقيق رابعة السكر كلاصي رابعة الزبدة لينة 2 خميرة الحلوة كاس الجنجلان منقي و محمر شوية المسكة الحرة مدقوقة الزيت على حسب الخليط
الطريقة
نغربل الطحين نزيد عليه السكر كلاصي شوية الملحة المسكة الحرة و الزبدة و نخلط حتى يترمل .نضيف الزيت حتى تتخلط العجينة.و ما تكثر بزاااف.ندير العجين في الكوكوط و نسد عليها و نخليها ليلة كاملة.و في الغد نلقاها رطابت .نزيد عليه الخميرة و الجنجلان ندلكها شوية و هاهي واجدة.نعمل من العجين كويرات على شكل غريبة و نغرس فيها القرنفل إلا كنتي كتحبي نسمة القرنفل في الحلوة.و ندخلها للفرن.نشعل الفوق هو الأول حتى تتشقق مزيان عاد نشعل الفرن من تحت.
نخدم الزبدة مع السكر كلاصي مزيان.نضيف الصفار البيض و لافاني و الخميرة و الدقيق و الكركاع و نخلط حتى نحصل على عجينة متوسطة ما قاصحة ما مرخوفة.
نعمل منها كويرة و نبسطها بين يدي على شكل غريبة ندوزها في بياض البيض و سنيدة و نزوقها من الفوق بالبوق ديال الحلوة.
الفقاص
المقادير
4 بيضات رابعة سنيدة كاس العنبة زيت نصف كاس الزبدة مدوبة نصف كاس حليب كاس اللوز مقطع بقشرته كاس الجنجلان محمر 2 خميرة الحلوة كيلو الدقيق
الطريقة
نغربل الطحين في القصعة مع الخميرة و شوية الملح.في زلافة كبيرة نخلط البيض و سنيدة و الزيت الزبدة مدوبة و الحليب و الجنجلان و اللوز و نفرغ الخليط على الدقيق و نخلط حتى نحصل على عجينة متجانسة نحربل العجين على شكل عصيات .ندهنهم بالصفر البيض مع شوية القهوة نسكافي و ندخله للفرن يطيب نصف طيبة.
نخليه يبات من الأحسن حتى للغد و نقطعه نرجعه يتحمر في الفرن.
هاذي هي المقادير و الطريقة ديال التحضير.نتمنى يكون كلشي واضح.و إذا عندكم أي استفسار أنا دائما في الخدمة.
موضوع: بلاطو حلويات صابلي من مطبخي المتواضع (صورة) 
